والله يا عدس غليت وبقيت بتمانية جنية
مابقتش تخش بيت والشعب حياكل ايه
والعيش مبقاش فى طابونة والقوطة بقت مجنونة
غليت حتى المكرونة والرز بقى بأبونية
الله يسامحك يا لحمة ياللى مخاصمة الغلابة
غلا وغليان وزحمة والدنيا حتبقى غابة
لادقيق ولا قمح كافى والشعب حيبقى حافى
قايدة النار والمطافى شلة لصوص وديابة
حتى انت غليت يا زيت خليت الشعب داخ
والموز مبقاش فى بيت ولا هوه ولا الفراخ
والخوخ والبرتقان حتى الجرجير كمان
ناقص يغلى اللبان ياخونا الوضع باخ
يا أهل الحكم الحقونا شب***ا جات له خضه
عايزين تجوزونا خلولنا الشبكة فضة
دى الفرحة بقت سراب والعيشة بقت هباب
الحاله بقت كرب و العيشه بقيت عذاب
حنبنى طوبة طوبة والطوبة بقت بكام
يادبلة الخطوبة غليتى ليه حرام
كله فى مشكله هايم وبقينا فى هم دايم
لو كنا يا ناس بهايم مين فى اديه اللجام
